అంతర్యానం అంటే ఏమిటి?

                            మన సౌరమండలంలో భూమి, దానిలాగే ఇతర గ్రహాలు తమ తమ కక్ష్యల్లో సూర్యుని చుట్టూ తిరుగుతున్నాయన్న సంగతి తెలుసు కదా. అవి ఇలా తిరిగే క్రమంలో కొన్ని సందర్భాలలో ఏదైనా ఒక గ్రహానికి - సూర్యుడికి మధ్యలో మరో గ్రహం వస్తుంటుంది. దీనినే అంతర్యానం అని అంటారు.
ఉదాహరణకు మన భూమికి సూర్యుడికి మధ్య బుధుడు (మెర్క్యురీ), 
శుక్రుడు (వీనస్‌) అనే రెండు గ్రహాలు ఉన్నాయి కదా. వీటిలో బుధగ్రహం కొన్ని సంవత్సరాలకు ఒకసారి భూమికి - సూర్యుడికి మధ్యలో వస్తుంది. అలాంటి సమయంలో సూర్యగోళంపైన ఒకవైపు నుంచి మరోవైపుకి ఒక చిన్న నల్లటి మచ్చ సాగిపోతున్నట్లుగా కన్పిస్తుంది. సూర్యగ్రహణానికిలాగే దీనిని కూడా మనం చూడవచ్చుగాని, నేరుగా మాత్రం చూడకూడదు. బుధుడి అంతర్యానం ఈ రోజు సంభవించిందని అనుకుంటే సరిగ్గా 13 సంవత్సరాల తరువాత రెండోసారి, ఆ తరువాత 7 సంవత్సరాలకి మూడోసారి, 10 సంవత్సరాలకి నాలుగోసారి, చివరగా 3 సంవత్సరాలకి ఐదోసారి సంభవిస్తుంది. అంటే బుధుడి అంతర్యానం 13-7-10-3 సంవత్సరాలకి ఒకసారి పునరావృతమవుతూ వస్తుంది. బుధుడి అంతర్యానం సాధారణంగా మే 2-8 తేదీల మధ్యన, లేదా నవంబర్‌ 5-15 మధ్యన చోటు చేసుకుంటుంది.
ఇటీవలి సంవత్సరాలలో 1999లోను, ఆ తరువాత 2006లోను బుధుడి అంతర్యానం జరిగింది. అంటే మళ్ళీ 2016లో గాని అది సంభవించదన్న మాట! అన్నట్లు బుధుడి అంతర్యానాన్ని మనం చూడగలిగినప్పటికీ బుధుడి పైనుంచి మాత్రం ఏ గ్రహపు అంతర్యానం కన్పించదు. ఎందుకో చెప్పుకోండి చూద్దాం!