ఐక్యరాజ్యసమితి జీవవైవిధ్య దశాబ్ధం..

  

జీవవైవిధ్య పరిరక్షణకు, సుస్థిరాభివృద్ధికి తోడ్పడే విధంగా ఒక వ్యూహాత్మక ప్రణాళికను అమలు చేయించే లక్ష్యంతో 2011-2020 కాలాన్ని 'ఐక్యరాజ్యసమితి జీవవైవిధ్య దశకం'గా ఐక్యరాజ్యసమితి 2011, ఏప్రిల్‌లో ప్రకటించింది. ఈ కాలంలో జీవవైవిధ్య పరిరక్షణకు రూపొందించిన కార్యక్రమాలకు మద్దతునివ్వడం, దీనికోసం అంతర్జాతీయ, ప్రాంతీయ సంస్థల కార్యక్రమాల అవసరాలకు మద్దతునివ్వడం, జీవవైవిధ్య పరిరక్షణ సమస్యలను అందరికీ తెలిపేలా కృషిచేయడం ఈ దశాబ్ధ వ్యూహాత్మక లక్ష్యాల్లో భాగం.
ఐక్యరాజ్యసమితి రూపొందించిన వ్యూహాత్మక జీవవైవిధ్యం ప్రణాళికలో కేంద్రీకరించిన అంశాలు..
* జీవవైవిధ్య నష్టాల్ని పరిమితం చేయడం.
* జీవవైవిధ్యాన్ని సుస్థిర వినియోగంతో కొనసాగించడం.
* ఇతరజాతులు, వాతావరణమార్పులు, కాలుష్యం, నివాసస్థలాలలో జీవవైవిధ్యాలకు వచ్చే ప్రమాదాల్ని గుర్తించి, ఎదుర్కొనేందుకు సన్నద్ధం చేయడం.
* స్థానిక విజ్ఞానాన్ని, ఆవిష్కరణలను, ఆచారాలను రక్షించడం.
* జన్యువనరుల వినియోగం, సంబంధిత అంశాలలో అందరికీ సమాన భాగస్వామ్యం కల్పించడం.
* అభివృద్ధి చెందుతున్న దేశాలకు అవసరమైన ఆర్థిక, సాంకేతిక వనరులను సమకూర్చడం.
* ఎరువుల వాడకాన్ని, పారే నీటిలో ఇతర జాతులు పెరగడాన్ని నివారిస్తూ, బయటి జంతుజాలాల దాడుల నుండి స్థానిక జీవవైవిధ్యానికి రక్షణ కల్పించడం.
మీకు తెలుసా..?
* 'బయలాజికల్‌ డైవర్శిటీ' పదాన్ని మొదట 'రేమండ్‌ ఎఫ్‌ డాస్‌మాన్‌' 1968లో ఉపయోగించారు. 1985లోనే బయలాజికల్‌ డైవర్శిటీ జంట పదాల్ని 'ఏకపదం' 'బయోడైవర్శిటీ' (జీవవైవిధ్యం) గా 'డబ్ల్యుజి రోజెన్‌' వాడారు.
* అటవీ జంతువులు, వ్యవసాయం, చేపలు, తదితర జీవాలు పర్యావరణలో ముఖ్యభాగంగా గుర్తింపబడ్డాయి. కానీ పర్యావరణ నిర్వచనంలో 'జీవవైవిధ్యాన్ని' చేర్చలేదు.
* పర్యావరణంలో నీరు, గాలి, భూమి, నివాసస్థలం ఇమిడి ఉన్నాయి. కానీ, పర్యావరణ పరిరక్షణలో గాలి, నీరు మీదనే కేంద్రీకరించి కృషి కొనసాగుతుంది.
* జీవవైవిధ్యం, జీవావరణ వ్యవస్థల సేవలను అందించేందుకు అంతర ప్రభుత్వాల ప్రణాళిక ఏప్రిల్‌, 2012లో రూపొందించబడింది. జీవవైవిధ్య, జీవావరణ వ్యవస్థను సుస్థిర యాజమాన్యానికి అవసరమైన ప్రపంచస్థాయి స్పందనను నిర్దేశించే లక్ష్యంతో ఇది రూపొందింది.
గమనిక: ఈ పేజీపై మీ స్పందనలను
9490098903కి ఫోను చేసి తెలియజేయండి.